[Back] [Home]

 

Programi zhvillimor për vitin 2007

Fusha I - Ujërat nëntokësore

“Vlerësimi, menaxhimi dhe monitorimi i ujrave nëntokësore në basenet kryesore ujëmbajtës me përparësi zonat turistike, urbane etj.

Punime e shërbime hidrogjeologjike për vlerësimin e rezervave të ujrave nëntokësorë dhe shfrytëzimin e tyre në basenet kryesorë të vendit, monitorimi sistematik i të gjithë treguesve hidrogjeologjikë.

Në kuadër të objektivit të qeverisë për furnizimin me ujë, do të paraqiten projekte teknike, që ofrojnë mundësi të reja për sigurimin e resurseve ujore për zonën bregdetare, urbane etj.

Fusha II – Resurset minerale

“Rivlerësimi i resurseve minerale dhe vënia e tyre në efiçencë”

Projekti synon rivlerësimin e vendburimeve kryesore të kromit dhe bakrit duke dhënë rekomandime konkrete që rritin vlerën e tyre dhe nxitin inverstimet private. Për nevojat e ndërtimit të infrastructures nevojiten lëndë të para, shfrytëzimi i të cilave nuk dëmton mjedisin. Për këtë qëllim do të kryhen punime vlerësuese dhe shërbime për gjetjen e alternativave të reja për përdorimin e agregateve shkëmbore, si dhe do të kryhet vlerësimi i lëndëve të para industriale dhe lëndëve të ndërtimit, që kanë interest të madh praktik. Krahas kësaj parashikohen punime për vlerësimin e metaleve të çmuara (platini etj.)

Fusha III – Administrimi i territorit dhe burimeve natyrore

“Punime komplekse hartografuese në shërbim të mirëadministrimit të territorit dhe burimeve natyrore në shkallë vendi dhe lokale”

Në kushtet e një zhvillimi të vrullshëm urban nevojitet aplikimi i punimeve hartografuese në shkallë të ndryshme për administrimin e territorit, mjedisit etj., të cilat janë të nevojshme për planifikimin urban etj., apo për zhvillimin ekonomik të qëndrueshëm. Këto punime në shkallë 1:25 000 janë kryer për një pjesë të madhe të territorit të vendit tonë. Parashikohet të shtrihen edhe në qarkun e Korçës, Fierit, Beratit, si dhe për të plotësuar disa pjesë të qarqeve të ndryshme të vendit tonë. Paralelisht parashikohet të kryhet vëzhgimi sistematik i fushës gjeomagnetike të Shqipërisë dhe rivlerësimi i dukurive anomale etj.

Fusha IV – Gjeomjedisi dhe monitorimi i tij

“Punime komplekse dhe monitorimi i gjeomjedisit”

Projekti synon zhvillimin integral, si dhe mbrojtjen aktive të mjedisit. Parashikohet të kryhen studime për gjeodinamikën, deltat e lumenjve, akumulimin dhe erozionin, qëndrueshmërinë e trojeve, ndotjet etj. Synohet të bëhet vlerësimi i impakteve ambientale të shfrytëzimit të zhavoreve të shtretërve të lumenjve, erozioni i brigjeve, dinamika sedimentformuese e rrjetit lumor të Shqipërisë. Gjithashtu do të vazhdojë të kryhet monitorimi i emanacioneve të radonit në tokë, ujë ajër, në zonat me rrezikshmëri të lartë, do të kryhet studimi gjeokimik i zonës urbane e periferike të Tiranës, do të përpilohet harta gjeologo-ambientale në shkallë 1:50 000 nga Shkumbini në Vlorë, do të realizohen studime komplekse gjeomjedisore për liqenet karstike akullnajore, për të rritur potencialin e tyre turistik, do të përcaktohen sheshet më të përshtatshme nga ana gjeologjike për stokimin e mbetjeve urbane në qytetet Prrenjas, Koplik, do të përgatitet dokumentacioni në mbrojtje të gjeomonumenteve me rëndësi kombëtare, do të kryhen studime për vlerësimin e ndotjeve në Kukës, Burrel etj., zonimi gjenetik hapësirës bregdetare shqiptare mbi bazën e ekosistemeve natyrore, monitorimi i dinamikës së vijës bregore në shkallën 1:50 000

Fusha V – Rreziqet gjeologjike dhe infrastruktura publike

“Vlerësimi dhe monitorimi i rreziqeve gjeologjike, punime gjeologo-inxhinierike për vlerësimin e qëndrueshmërisë dhe zgjerimi i infrastrukturës publike”

Reziqet gjeologjike kanë pasoja serioze për zonat turistike urbane dhe rurale, si dhe kërcënojnë qëndrueshmërinë e infrastrukturës. Parashikohet të kryhen punime për vlerësimin e rreziqeve gjeologjike (shembje shpatesh, erozion, zona që përmbyten, degradimi i tokës, lagunave, dëmtimi i akseve rrugore etj.) Njëkohësisht parashikohen të kryhen punime gjeologo-inxhinierike të qyteteve turistike, harta 1:50 000 të rrezikut gjeologjik të zonave urbane e rurale që kanë karakteristike zhvillimin e fenomeneve gjeodinamike, ku do të evidentohen e klasifikohen sipas rrezikshmërisë dhe intensitetit të tyre zonat e rrezikshme, duke propozuar masa për zbutjen e efekteve negative.

Punimet e rajonizimit gjeologo-inxhinierik do të zhvillohen në Sarandë, Gjirokastër, Berat, Divjakë, Peshkopi, Laç, Milot etj. Studime të posaçme hartografuese për vlerësimin e rrezikut gjeologjik do të bëhen për shpatet e liqenit të H/C Koman (Pukë e Trpojë), për vlerësimin e stabilitetit të truallit, për shtyllat e tensionit të lartë në disa zona të vendit tonë, ku ka mjaft probleme shqetësuese, do të kryhet monitorimi i digave të larta mbi 30m, si dhe studime metodike për të gjitha llojet e punimeve gjeologo inxhinierike etj.

Fusha VI – Gjeoinformacioni

“Zhvillimi i mëtejshëm i sistemit të informacionit, banka e të dhënave, transmetimi i informacionit drejt organeve vendim marrëse dhe shoqërisë”

Në vazhdim të punimeve të kryera më parë për përgatitjen e bazës dixhitale hartografike për zonat turistike e urbane, për përpunimin e informacionit për gjeologjinë, lëndët e para, gjeologjinë inxhinierike, ujin etj., synohet përpunimi i mëtejshëm dhe informatizimi standart i të dhënave bazë. Kjo shpejton shfrytëzimin e rezultateve, si dhe mundëson transmetimin e shpejtë të informacionit drejt organeve vendim-marrëse. Të gjithë projektet që realizon SHGJSH, mbështeten dhe janë të bashkërenditura në këtë projekt. Po ashtu, parashikohet të kryhen botime dhe publikime të ndryshme, që pasqyrojnë veprimtarinë e Shërbimit Gjeologjik. Përr ritjen e nivelit profesional e shkencor të specialistëve që kryejnë projektet, nevoja të ndryshme të punës aplikative, përmirësimit e nivelit shkencor të saj etj., parashikohet pjesmarrja e specialistëve në SHPU, në kualifikime të ndryshme, workshope dhe veprimtari të tjera. Gjithashtu parashikohet pjesmarrja në panaire, ekspozita, takime ndërkombëtare ku paraqiten dhe ballafaqohen rezultatet e punës.

Fusha VII- Studime dhe projektime për nevojat emergjente sipas kërkesave të pushtetit lokal

Pushteti qëndror e lokal ka kërkesa të shumta nga komuniteti për studime të karakterit emergjent (furnizim me ujë, rrëshqitje të truallit, shembje, përmbytje etj.). SHGJSH, përgatit studime, projekte duke zgjidhur problematikën korente dhe prespektive. Kërkesat e kësaj natyre janë të shumta dhe në rritje nga viti në vit.